Isa 21 | NdeIBE | STEP | Isiqalekiso mayelana leNkangala engasoLwandle: Njengesivunguzane sidlula elizweni langasezansi, umhlaseli uvela enkangala evelela elizweni elesabekayo.

Isaiah 21

Isiphrofetho ngeBhabhiloni

1 Isiqalekiso mayelana leNkangala engasoLwandle: Njengesivunguzane sidlula elizweni langasezansi, umhlaseli uvela enkangala evelela elizweni elesabekayo.

2 Ngitshengiswe umbono owesabekayo. Umthengisi uyathengisa, umkhuthuzi uthatha impahla. Elami, hlasela! Mediya, vimbezela! Mina ngizakuqeda konke ukububula akudalileyo.

3 Ngalokhu umzimba wami uyafuthelwa, ngiphethwe yibuhlungu obufana lobowesifazana ehelelwa. Ngithithibaliswa yilokhu engikuzwayo, Ngidideka ngalokhu engikubonayo.

4 Inhliziyo yami iphela amandla, ukwesaba kungenza ngiqhaqhazele; ukuhlwa engibe ngikufisa, sekusesabeka kimi.

5 Itafula bayilungisile, bendlala amalembu bayadla, bayanatha. Sukumani lina zikhulu, ligcobe amahawu!

6 Lokhu yikho uJehova akutshoyo kimi: “Hamba, misa umlindi abike akubonayo.

7 Angabona izinqola zempi, kulemihlambi yamabhiza, abagadi phezu kwabobabhemi loba abagadi phezu kwamakamela, kaqaphelise; aqaphe sibili.”

8 Umlindi wasememeza esithi, “Nkosi yami, usuku ngosuku ngiyema phezu komphotshongo wokulinda; ubusuku ngabunye ngihlala ensikeni yami.

9 Khangela, nangu umuntu esiza esenqoleni yempi lomhlambi wamabhiza. Uphendula esithi, ‘IBhabhiloni isidilikile, isidilikile! Zonke izifanekiso zezithombe zayo zihlakazekele phansi!’ ”

10 Awu bantu bami abasicilelwe endaweni yokubhulela, ngilitshela engikuzwileyo kuvela kuNkulunkulu uSomandla, kuvela kuNkulunkulu ka-Israyeli.

Isiphrofetho nge-Edomi

11 Isiqalekiso esimayelana leDuma: Umuntu othile uyangimemeza eseSeyiri, esithi, “Mlindi, kuyini okwebusuku okusaseleyo? Mlindi, kuyini okwebusuku okusaseleyo?”

12 Umlindi uphendula esithi, “Ukusa kuyeza, kodwa lobusuku buyeza. Uma ufuna ukubuza, buza; uphinde ubuye futhi.”

Isiphrofetho nge-Arabhiya

13 Isiqalekiso esimayelana le-Arabhiya: Lina zindwendwe zamaDedani Elimise emahlabathini ase-Arabhiya,

14 lethelani abomileyo amanzi, lina elihlala eThema lethelani ababalekayo ukudla.

15 Babalekela inkemba, inkemba eqatshisiweyo, babalekela idandili eligotshiweyo, lokutshisa kwempi.

16 Lokhu yikho uJehova akutshoyo kimi uthi: “Phakathi komnyaka owodwa, njengendlela isisebenzi esibotshwe yisivumelwano esingawubala ngayo, lonke udumo lweKhedari luzaphela.

17 Abasindayo kwabemitshoko, amabutho aseKhedari, bazakuba balutshwana.” UJehova, uNkulunkulu ka-Israyeli, usekhulumile.